Nýr vefur Veðurstofunnar hefur verið settur í loftið

Fyrsti hluti af nýjum vef Veðurstofunnar fór í loftið í dag. Fyrstu útgáfur nýja vefsins verða aðgengilegar á slóðinni gottvedur.is, en smám saman eftir því sem verkefninu miðar áfram munu þær færast yfir á vedur.is. Þessi útgáfa er fyrsta varðan í umfangsmiklu stafrænu umbreytingaverkefni sem Origo hefur unnið fyrir Veðurstofuna á vef þeirra vedur.is, sem er einn mest sótti vefur landsins. 

Uppbygging á öflugum og nútímalegum innviðum og endurhönnun vefs Veðurstofunnar var unnin með áherslu á notendaupplifun, uppitíma og mikilvægi þess að styðja við grunnþjónustu fyrir landsmenn.

Veður í nýjum búningi 

Vefur Veðurstofu Íslands er fyrsti viðkomustaðurinn þegar landsmenn þurfa upplýsingar um veðurfar og náttúruvá. Hlutverk Veðurstofunnar er að stuðla að bættu öryggi almennings, eigna og innviða gagnvart öflum náttúrunnar. Vefurinn er eitt mikilvægasta verkfæri Veðurstofunnar til að miðla upplýsingum og með nýjum vef verður upplifun og þjónusta við notendur enn betri:

• Skýrara viðmót og betri framsetning veðurupplýsinga 

• Bættar viðvaranir um náttúruvá 

• Aðgengilegra fyrir alla, unnið í samstarfi við Blindrafélagið 

• Virkar vel á öllum tækjum - símum, spjaldtölvum og tölvum 

Verkefnið hefur verið unnið í nánu samstarfi við Veðurstofuna og Metall Design Studio, sem sá um hönnun vefsins.  

Öflugri innviðir fyrir mikilvægan vef 

Nýr vedur.is er ekki eingöngu notendavænni - hann er byggður á traustum grunni sem tryggir áreiðanleika þegar mest á reynir. Umfangsmikla stafræna umbreytingu þurfti til að tryggja örugga gagnainnviði til framtíðar. 

Sérstök áhersla var lögð á að: 

• Tryggja uppitíma, þola mikið álag, sérstaklega við náttúruhamfarir 

• Gera veðurupplýsingar aðgengilegri og sjónrænni 

• Bæta framsetningu viðvarana 

• Nútímavæða tæknilega innviði 

Sá vefur sem fór í loftið í dag er aðeins fyrsta skrefið - við munu bætast fleiri einingar og vefurinn þróast í takt við þarfir og endurgjöf landsmanna.